كنا قاعدين ف ساعة صفا هى و انا صاحبتى اللى قلبها قريب من قلبى و روحها بتفهم روحى.... و بنحكى ... كنا بنحكى على اول مرة كل واحدة فينا عتبت البيت الحرام .... و لمحت عينيها بترغرغ و هى بتحكى ... 

اول طلة على الكعبة كانت احساس مختلف عمرى ما حسيته ف حياتى و ما عرفتش احسه تانى بعد كده ... عارفة لما تكونى كنت تايهة ف الدنيا من غير ونس و لا عزوة و لا بيت و لا حضن يدفيكى و بعدين فجأة تلاقى حضن و بيت و ونس و عزوة ... عارفة لما تكونى واقفة بطولك شادة جسمك و ماسكة نفسك و عضلاتك كلها مشدودة عشان تعرفى تعافرى و تقفى على رجليكى ف الدنيا لوحدك و بعدين فجأة ف عز ما انت مشدودة كده تيجى واحدة تاخدك ف حضنها و جسمك كله يفك و مشاعرك تفك و كل الاسوار و الحيل الدفاعية بتاعتك تقع و تلاقى نفسك بتلينى ف قلب الحضن و عينيكى بتسح من غير ما تعرفى ليه .... و لله المثل الاعلى ... و كتاب الله ساعة ما دخلت الحرم لقيتنى فجأة كده دموعى عمالة تنزل و تسيح على خدودى و هدومى و انا و اقفة و وانا راكعة و وانا ساجدة و مش عارفة تقف ...زى ما اكون واحد كان ماشى مشوار طويل اوى بيدور على الامان و فجاة لقاه ...احساس غريب بالونس و الطمأنينة و الراحة كأن الزمن وقف و الدنيا وقفت و الناس اختفت و ما فضلش غيرى و غير الكعبة و الحضن اللى بلعنى بمنتهى الحنية ... لدرجة ان الناس بدات تستغرب هو انا عاملة عملة و باتوب و لا اكمنى مش متزوجة حزينة و بادعى اتزوج او اجيب طفل ... هو بس سبحانه و تعالى اللى كان شايف و عارف ... زى ماكون فجأة لقيته بعد سنين مشتاقه له ..... و من كتر ما كان قلبى متعلق بيه كل اللى نزل عليه و انا باطوف الاستغفار ... امى تقول لى ادعى بالنجاح كانت سنة التخرج سنتها ... ما اقدرش من مهابة الموقف استحيت اطلب حاجة للدنيا ... بقى ابقى ف بيته و اطلب احقر حاجة اللى هى الدنيا بقى ابقى ف امنه و امانه و اطلب الزوج و الولد و الفلوس ... و الله ما قدرت ... كل اللى نزل عليه ... سامحنى يا رب ... استغفر الله العظيم و اتوب اليه ... رب اغفر و ارحم و اعفو و تكرم انك تعلم ما لا نعلم انك انت الله الاعز الاكرم ... لحد ما دخلت حجر اسماعيل و بدات اصلى ركعتين التحية و سجدت و لقيتنى كل اللى نزل عليه و انا ساجدة يا رب انا ماشفتش الامان ف حياتى الا هنا ... يارب انا مش عايزة الناس ولا الدنيا تانى ... دلنى على عدن ... يارب آخر ركعتين يكونوا هنا اموت و انا ساجدة على رخام الحجر و اندفن هنا ف ونس بيتك الحرام يا رب.... 

و اتنهدت و خدت نفس غويط و سابت الدموع .... و سابتنى القط نفسى بالعافية و الاحق دموعى اللى سرحت ف الامان و الونس و الشوق للبيت الحرام ... سامحك الله يا شيخة قلبتى عليه المواجع بقالى كام سنة مش عارفة اعتب الحرم .... 

و نشفت دمعها و لحقتنى هى تانى و هى بتبتسم و قالت ...

خرجت يومها من الكعبة و انا باقول انا ماليش الا ربنا و بس ... يتحايلوا عليه ازور الرسول عليه الصلاة و السلام اقول يااااااااه اضيع يوم ف الزيارة و اسيب البيت الحرام .. ابدا ... مانا جاهلة و معجونة بالغباوة و الافكار الملخفنة بقى ... المهم ولاد الحلال قالوا لى ده ادب مع الله انك تزورى الرسول عليه الصلاة و السلام .... نهايته سمعت الكلام و رحت و انا مش مقتنعة مش سوء ادب قد ماهو انى مستخسرة الاحساس اللى كان ف الكعبة و عايزة اعيده و ازيده تانى و اخزنه و احفره و انقشه على قلبى و مشاعرى عشان اعيش بيه شوية لحد ما ارف ارجع تانى... و بعدين ربنا يسامحنى بقى شأنى شأن معظم الجهال ماعرفهوش الحبيب المصطفى عليه الصلاة و السلام فمش عارفة احبه ازاى و مش عارفة مقامه الشريف ....

المهم ركبنا الاوتوبيس و ركبنى انا رعب غريب و بقيت عاملة زى واحد مكروش من الخوف ... دخلت الحرم النبوى الشريف ... مافيش مشاعر خالص و لو تصدقينى و الله العظيم حسيت ان صاحب المكان مش عايزنى ....

 لفت نظرى اوى منظر الجزائريات و هم عمالين يحيوا الحرم و يطلبوا الشفاعة ... و يسلموا على الحبيب عليه الصلاة و السلام و اتهزيت شوية خفيفة لكن فضل برضك احساسى الغريب انى مش فاهمة... غصب عنى عقلى العلمانى الملخفن وقتها كان مش فاهم ... ازاى بنسلم عليه و يرد السلام .... و دخلت مكان النساء شاوروا لى على الروضة المطهرة اللى هى حتة من الجنة ... حاولت ادخل اصلى ما امكنش و تانى و ما تسألينيش ازاى ولا باى منطق او عقل ... وصلنى الاحساس انى مش مرغوب فيه ف المكان و انى ماليش فيه عيش و انى مطرودة من صحبته الشريفة ... و خرجت من المسجد و انا مستغربة الناس كلها صلت الا انا ... الناس كلها ارتاحت و سكنت ف المدينة الا انا مع ان اهل المدينة فيهم بشاشة و رقة لطيفة لكن و لو ... انا مليش معاش فى هذا المكان...

 و رجعنا جدة و انا باعشم نفسى انى حاعوض ف الحرم... و شاءت الاقدار انى ماعرفش اروح الحرم المكى تانى و اركن ف البيت شوية اقرا على ما تتاح فرصة فى وسط عمل اهلى و نقدر نروح ... و عترت على كتاب عجيب كله ادعية و احاديث عن الرسول عليه الصلاة و السلام و من ضمن الاحاديث حديث عن رجل اصابه العمى فذهب الى الحبيب المصطفى ليدعو له فقال له اذهب و صلى ركعتين و اسأل الله بمقامى عنده و محبتى له ان يشفيك و يعافيك ففعل الرجل و شفى ... ياااااااااه اد كده مقامه عالى ....اد كده انا ماعرفهوش ...اد كده انا جاهلة بمقامه عليه الصلاة و السلام ...و يومها صليت و استغفرت و دعيت ربنا ف سرى انه يسامحنى على جهلى و قلت لربنا يا ربى انا اوعدك انى حابدا اتعرف على الحبيب لمصطفى و شمائله عشان احبه اكتر و لحد ما اعرفه انا حاحبه عشان هو حبيبك ...و ف سرى صليت عيه و اترجيت ربنا يوصل له سلامى ...

و بعدها باسبوع كانت اول رحلة للمدينة المنورة و رحت الحرم النبوى الشريف و المرة دى كانت زيارة من ورا العقل ... و الله العظيم كمية تساهيل لا تتخيليها ... و دخلت على الحبيب المصطفى عليه الصلاة و السلام  سلمت و صليت عليه و قرات الفاتحة و دخلت الروضة المطهرة فى سهولة و يسر لا تتخيليه و صليت و اترجيت الجنة ركعتين ف ركعتين ف ركعتين لما ارتويت و شبعت ... خطر ساعتها ف بالى خاطر ...معقول.... !!!....المرة دى مختلفة بجد ... يمكن بس الدنيا فاضية ففيه سماح ف المكان و الوقت ... يمكن ظروف السفر اريح فانا كويسة و مرتاحة ... مخى و عقلى اللى لسه راكبين شمال تعملى ايه بقى...و رفعت راسى من السجود و لسه حابدا ركعتين تانيين لمحت ست واقفة مستنية فرصة تسجد فى الروضة المطهرة فقمت سبت لها مكانى و دخلتها تصلى و لسان حالى بيسال ربنا يا ترى سامحتنى يا رب يا ترى حبيبك سامحنى ... يا ترى ....؟؟؟... مالحقتش اكمل سؤالاتى و لقيت الست اللى كانت جنبى من الناحية التانية فضى مكان جنبها ف الروضة فبتشدنى من عبايتى عشان ادخل الروضة تانى عشان اكمل صلاة .... مش عايزة اقول لك بقى على اللى جرالى ساعتها ... حسيت ساعتها و ليكى الحرية انك تصدقى او ما تصدقيش انى باسمع الرد ... و ان ربنا قابلنى و ان الحبيب المصطفى عليه الصلاة و السلام قابلنى و راضى بوجودى فى جواره فى الحرم الشريف ... و نزلت على قلبى سكينة عجيبة تانى و اترجيت اشوفه و اقابله عند الحوض و استمتع بشفاعته و اشرب من ايده و احشر ف زمرة اصحابه و اهل بيته الاخيار و فضلت ساجدة ادعى لحد ما الزيارة خلصت و طلعونى بالعافية ...

يا سبحان الله ...

سبتها تقوم تغسل وشها و انا بابرم ف اللى قالته... اد ايه رحمتك بينا كبيرة يا رب بقى تشوفنا تايهين و ملخفنين و تدلنا و ترجعنا ...مع انك مش محتاج لنا ...ولا عبادتنا تزودك و تزود ملكك ولا تنقصك ...احنا اللى محتاجينك و انت اللى بتجبر بخاطرنا برضك و ترجعنا للطريق ... و افتكرت كلام الحبيب المصطفى عليه الصلاة و السلام اللى معناه ان الله يفرح بالعبد اذا اتاه فاذا اقترب العبد من ربه و الرب غنى عنه اذا اقترب العبد شبرا اقترب الله اليه ذراعا و يزيد ف الاقتراب فيزيد المولى عز و جل حتى ينتهى الحديث بانه اذا اتى العبد ربه ماشيا اتاه المولى عز و جل مهرولا .... يا سبحان الله ... ايه يا ربى الكرم و المدد ده كله ....

قطعت عليه افكارى تانى لما دخلت تانى مبتسمة ...

قلت لها هديتى...

قالت.... الحمد لله ...  

و ياترى سامحتى ...

قالت ... يااااااااااااااه و اى سماح ... تصدقى مافيش بنى آدم وجعنى الا و دعيت له بالهداية و الرحمة .... هو الخير اللى انا فيه كان ممكن يكون لو ماكانوش وجعونى و خلونى افزع الى الله ... جميلهم والله فوق راسى من فوق ... ايام و شهور و سنين و انا على السجادة بابكى بين ايديه هو و بس و اطلب المدد و الطمأنينة و السكن ... لولاهم عمرى ما كنت حافهم ... اوعى تزعلى من حد اذاكى اطلبى له الرحمة لانه ده النور اللى خلاكى تسيبى الدنيا و تشوفى العلامات بتاعة عدن ... انا مش باقول كلام انشا و جرايد ... انتى عارفه اد ايه انا كنت بنى ادم مرتاح و عارفة كمان اد ايه انا كنت من اهل الغفلة و الجهل ... لولا الوجع و الحرمان ماكنتش فقت ان مش دى الارض اللى مفروض ازرعها ... لولا الالم ماكنتش اتعلمت لما تجينى النعمة ازاى اشكر عليها ... و الله قسوتهم كانت رحمة ...مش معقول يكونوا سبب ف خير ليه و انا افتكرهم بالشر ...و الله مسامحة اوى فوق ما تتصورى و باحب الناس كلها ف الله  ... و بعدين مش الشيخ عمر بيقول ان الناس  المحرومين ف الدنيا من الحاجات اللى غيرهم اتمتع بيها من زوج و ولد و مال دول رحمة و نور للى حواليهم و لو صبروا حيعوضهم ان شاء الله ...

اتنهدت و انا باسمع اللى بتقوله و داريت استغرابى ... كانى ماعرفهاش و هى صاحبتى اللى روحى ف روحها ...

 و سرحت ف  كلام رابعة العدوية اللى استشكل عليه فهمه سنين ... "و ليت الذى بينى و بينك عامر و بينى و بين العالمين خراب ...اذا صح منك الود فالكل هين و كل الذى فوق التراب تراب ... احبك حبين حب الهوى و حب الذى انت اهل لذاك ... فاما الذى هو حب الهوى فشغلى بذكرك عمن سواك ... و اما الذى انت اهل له فكشف الحجب حتى اراك ..."

 و رنت ف ودنى دعوتها قبل ما ننام و هى بتترجى ربنا و انا معاها طبعا ...

اللهم لا تحرمنا ميتة شريفة ترحمنا بها ساعة اللقاء... اللهم احسن خاتمتنا فندخل بيتك الحرام صائمات محرمات .. نعتمر  و تقبل عمرتنا و ندخل حجر اسماعيل نسجد على احرام و صيام ... فلا نقوم من سجدتنا ولا نفطر و لا نحل احرامنا الا على لذة النظر الى وجهك الكريم فى فردوسك الاعلى ... اللهم لسنا اهل لذلك و لكنك الكريم فتصدق علينا ولا تحرمنا من لذة النظر الى وجهك الكريم و جوار الحبيب المصطفى عليه الصلاة و السلام و آل بيته و الصحابة و التابعين و تابعيهم باحسان...

آمين يا رب العالمين....

فى امان الله

س.م.