IhdaaLZaynab

فى ساعة صيف

و الجو لسه هادى و لطيف

عدى عليه ضيف

بلغة اهل الكلام

بيقولوا انه كفيف

وقف قصادى و مد ايده

و قال

يا هل ترى يا طبيبة

عمرك رسمتى الخوف

عمرك وصفتى الخوف

مديت ايديه على فرشتى

و ع الالوان

و سرحت جوه الامان

و سرحت بره الزمان

لون الامان يمكن يكون لبنى

لون السما الصافى

و ابيض

كما حبة لبن دافى

و عيل صغنن ما يخافش

لما يدوس على الارض

حافى

و قلب بيدق صح

بيدق رغم الخوف و الدق

متعافى

و لون الامان يمكن يكون اسمر

كما الحليب ب البن متعكر

و النيل

و حجر الصوان و المرمر

و طعم الامان

كمان

يمكن يكون اخضر

و روحه مشوار طويل

قلب الصحارى و فوق الجبال

يعنى كمان اصفر

و لون الامان

كما زهرة بمبى او حمرا او بيضا

لما تنتعش و تتحرر

و تكبر

ف قلب الخوف

يعنى جنين

يتولد قلب الحنين للشوف

يعنى انين

يتوعد بيه اللى عنده ظروف

يعنى

اصطباحة رقيقة و طيبة

تسكن طريق الكسوف

يعنى

شوية طبطبة

على كتف واحد بيبكى ع المكشوف

يعنى لون الدموع

و الدمعة لون جسر الحياة

تعبر برغم الوجع

قلب الموات و الخوف

و لون الامان

يا زمان

نفرة حصان

و رفرفة طير برىء

ساعة الادان

و هفهفة قلبى الجرىء

برغم الخوف

من الناس ف اى مكان

و عصفور نغش ينقر على شباكى

ارمى له حبة رز

و حبة حنان

و قطة بعيون خضرا زرعى

تنونو و تاكل معايا ف لقمتى

من غير ماخاف لقمتى ما تكفيش

و ابص حواليا برضك

و اشوف

لو حد غيرى جعان

و ارمى حمولى على الرزاق

برغم قلة المصروف

يا هل ترى يصح يطلع ايه

لون الخوف

ممكن يكون لون وحشتى

ساعة ماكون من غير ناس

يعنى يكون

كحلى

بس الونس مش كترة الناس

الونس دنيا مسكونة بالاحساس

لونها قلوب مستحية

ف مشمشى دافى و كباية عصير طازة

على وش صبح لذيذ

مرسوم على الكراس

و الكحلى ده

لون مية البحر ساعة ليالى الصيف

و شط البحر و انا ماشية بالليل

على مهلى

لا

الخوف لونه مش كحلى

ماعادش فاضل غير الاسود

يصح يصبح ده لون الخوف

اسود

بس النجوم و الكلام

و محتوى الاحلام

بيلعلعوا قلب السواد البهيم

لا

الاسود ده ملك الالوان

و اللى يقول غير كده بصراحة

يبقى غشيم

عمر السواد ما كان لون الخوف

يصح يطلع ايه لون الخوف

حيرتنى يا حضرة الضيف

مريت ف لحظة كما الطيف

الخفيف اللطيف

نكشت قلب دماغى

مع انى كنت ناوية ارتاح

قلب السكات و الصيف

و سبتنى و مشيت

و انا نفسى افهم منك

يعنى ايه كفيف و مش كفيف

و يعنى ايه ضعيف؟؟

من يومين و الكلمات دى بتبرم جوايا لانى كنت باحضر نفسى لمقابلة انسانة بلغتنا كفيفة لكن بعد ما اتكلمت معاها فترات على التليفون و يمكن من غير ما تعرف هى اكتشفت انها زرعت جوايا شحنة مشاعر غير عادية بكلامها البسيط و جرت خيط الكلام و الاحاسيس من قلب قلبى و غصب عن عينى بفكرها الحويط الغويط

س.م

The Egyptian Chronicles is a co-op of Egyptian authors.
Articles contained in these pages are the personal views, or work, of the authors,
who bear the sole responsibility of the content of their work.

BACK TO MAIN PAGE

For any additional information, please contact
the Webmaster of the Egyptian Chronicles:

DESIGNED BY