سرحت غصب عنى و انا عماله اسمع كلامه و افكر فيه .....اصل فيه كام  محمود فى الحياة كده لما يقابلوا الواحد لازم يسيبولوا علامات و ذكريات تعلَّق معاه....

و افتكرت المولد...

و المولد ده طول عمره كان اختراع فى حياتى...الليلة الكبيرة و الحضرة و الغازية ام قلب قاسى و الاراجوز اللى وشه بيضحك و قلبه بيبكى و الممنوع اللى كان طول الوقت مرغوب ...العالم السحرى اللى الولاد بس هم اللى ممكن يزوغوا و يروحوه و يشوفوه بحق و حقيقى انما البنات طبعا نخاف عليهم من الحاجات دى ....

و فضل المولد اختراع يبرم فى ام رأس حضرتى لحد ما ابتدت بنت خالتى و هى مهندسة معمارية و  مهتمة بالاثار تروح الحتت دى و تحكى لى.... و جابت لى من هناك حمامة نونو معمولة من الورق لا زالت متعلقة فى اوضتى حتى الان ...

و كبرت و كترت الحواديت فى حياتى و اتركن المولد فى ركنة نونو ف قلبى فيها من ريحته الحمامة و حدوتة قديمة قريتها عن واحد من اهل المولد كان جسمه ضخم جدا و كان قلبه رقيق اوى زى قلب اليمام مليان احلام رقيقة ماحدش يعرف عنها اى حاجة ....من ضمن احلامه كانت الغازية الجميلة اللى طبعا ماكانتش حاسة بيه خالص... و ماحدش كان بيعرف يشوف قلبه الرقيق ده ابدا و لا يعرف ابعاد احاسيسه لحد لما ف يوم خيام المولد ولعت نار و اتحرك القلب الرقيق من الخوف على حبيبته الغازية و جرى قلب النار عشان يلحقها و لحقها فعلا لكن النار طالت جسمه الضخم التقيل فدفعها بره الخيمة بعزم مافيه و ولع هو فى النار ...

 كل الحاجات دى نطت فجأة من الركنة القديمة لما سمعت محمود المرة دى و هو بيتكلم...

و محمود  ده بقى واحد من الناس اللى كانوا دايما مستشكلين على مفاهيمى ...

 الفرق فى السن بيننا بيتهيالى ماكانش كبير لكن لانه طويل و ضخم و مختلف فانا كنت على طول باتامله من بعيد لبعيد و ما اتجرأش اقرب منه ... و لما اتلامض معاه من باب انى اثبت لنفسى انى مش خايفة منه اتلامض من بعيد لبعيد ... و هو دايما كان يبص لى و يسكت ... طبعا ماهو لو عطس على حضرتى لا مؤاخذة يحرقنى .....

المهم محمود ده ساب اللى وراه و اللى قدامه و بعد ما خلص دراسته راح الغردقة و ابتدا يمارس هوايته و غرامه الاول و الاخير اللى هو الغطس و تحولت الهواية مع الوقت الى حرفة و انطلق هناك و نجح و بقى له حياة مختلفة تماما عن العادى اللى بنسمع عليه ... و زود لى بعد عملته دى صعوبة فهمه لانه تحول الى سوبرمان فنان بيعارك سمك القرش و يغوص فى الاخطار و يحكى على المراكب الغرقانة و يحكى كمان عن السمك الجميل و العالم الساحر اللى تحت الميه و الشعب المرجانية و الجمال اللى ف خلقة ربنا ...

و فضل محمود اختراع بالنسبة لى لحد اليوم ده لما فجاة و من غير مقدمات ابتدا يحكى على التحقيق اللى كان داخله.... و لمحته بسرعه بيدارى عينيه من ورا النضارة و هو بيقول انا من يومين قلبى انشطر نصين والله ... كنت داخل احقق فى حالة غرق ...و احدة ست غرقت و بعدين بادور على ورقها لقيت بنت صغيرة عندها 9 سنين واقفة بره الاوضة ... فقربت منها و قلت لها ممكن يا حبيبتى الاوراق... فضمت الورق لصدرها و رفضت تديهونى و بصت بعيون كلها براءة و قالت لى لا ماما ادتهولى و قالت لى حافظى عليه و انا مش حاديه غير ليها لما تخرج من الاوضة دى...و سالت بعينيها من غير ما تسال ... مش هى حتخرج يا عمو.... و قال محمود انا ماعرفتش ارد و ما قدرتش ارد.... كل اللى قدرت اعمله انى مشيت و حولت التحقيق لناس تانية .... و حاولت امسك قلبى اللى اتقسم نصيين قد ما اقدر .....

و سكت محمود ...

و افتكرت محمود تانى ...

ابويا ظابط البوليس الشجاع اللى ياما اتحدى الظلم و وقف ف وش الفساد و ما خرجش من الدنيا الا بالسيرة الطيبة و الستر ...

افتكرته لما جت تزورنا واحدة ست من قرايبنا حالها مش متيسر و مد ايده ببساطة و بينه و بينها على الباب اداها الاتنين جنيه اللى كانوا فى جيبه ...و لما امى لطمت و قالت له طب اقسم بيننا و بينها قال لها احنا ف بيتنا جبنة و عيش هى ممكن يكون جوفها مادخلوش لقمة من يومين الست دى ما تجيش الا لو كانت مازومة اوى ....

و افتكرته  لما دخلنا النادى و اعلن لنا الخبر الفتاك انه نسى المحفظة و ان مافيش ف جيبه غير عشرة صاغ و اتفقنا اننا حندخل بقلاطة و نكمل الفسحة و نطلب زجاجة واحدة ميريندا و نتقاسم فيها احنا التلاتة هو و اخويا و انا....

و افتكرته برضك لما خرجت العب مرة ف رحلة ف وسط العيال و انا عندى التهاب رئوى و اهاليهم منعوهم يلعبوا معايا لا يتعدوا منى و رجعت الاوضة مكسورة الخاطر لان العيال اهاليهم خوفوهم منى و خرج محمود " الظابط الفنان برضك اللى علمنى امسك القلم و ماخافش منه لما ينكش مشاعرى بجرأة"...خرج و زعط اهاليهم و علمهم الادب و فهمهم ان من الانسانية لما تعوزوا تخافوا على عيالكم ما تجرحوش و تفعصوا مشاعر عيل تانى فى السكة و ان كان ممكن يكون فيه تصرف ارق من كده ...!!!

يومها كل اللى فاكراه انا انى رفعت راسى المدلدلة و حسيت يومها ان انا لى ضهر فى الدنيا و مش اى ضهر ده ضهر شديد ممكن اتسند عليه و انه بالرغم من العلقة اللى بيديهالى ساعات لما اغلط بس راجل بيفهم و بيحس ...

و  فقت من سرحتى على صوتها  و هى بتهمس هو جدو حودة مات يا ميمى؟؟.. قلت لها ايوه يا حبيبتى سبقنا على الجنة عشان يوضب لنا البيت بتاعنا هناك يا حبيبتى و لما ييجى ميعادنا حنحصله...

حنحصله ازاى يا ميمى بالطيارة.؟؟؟

احتمال والله مش عارفة اوى يا نونو ...!!!

و هى الجنة فيها مين غير جدو حودة يا ميمى ؟؟؟

فيها كل الناس الطيبين اللى بيعرفوا يحسوا ببعض  و يطبطبوا على بعض...و فيها الناس اللى قلوبهم جريئة و عيونهم بريئة و مشاعرهم رقيقة ....و فيها الناس الهادية اللى قلبها حلو و  ما بتحبش تزعل حد ...و فيها الناس اللى ما تقدرش تاكل و غيرها جعان و تقسم لقمتها مع اللى جنبها حتى و لو كانت لقمتها بتلاتة تعريفة ... و فيها العصافير و اليمام و الحمام و فيها الشجر و النخل و الملايكة.... و فيها الشمس الشموسة اللى حتاخد سنة الفسفوسة و تديها سنة العروسة.... وفيها سيدنا محمد عليه الصلاة و السلام  و الفرسان الشجعان اللى كانوا معاه ....و فيها كل الناس اللى بتعرف تحب ببساطة .....

و فيها امير الاحلم يا ميمى....؟؟

و فيها امير الاحلام يا نونو...

و الملايكة حتلعب معايا و تحكى لنا حواديت يا ميمى ..؟؟؟

امال يا نونو..

و انا كمان يا ميمى...؟؟

و انتى كمان يا ميرو...

و مافيش مدرسة؟؟؟

طبعا قطعا و حتما يا قطاقيط...

دى الجنة دى حلوة اوى يا ميمى ....

اوى يا حبايبى اوى اوى ....

و ناموا القطتين ف حضنى......و دعيت ف سرى ربنا يخليلهم ابوهم .....و يخللى محمود ليوسف ابنه اللى بيدخل المدرسة متاخر غصب عن عين الناظر و من غير عقاب لان ابوه هو اللى بيأخره ....و وجهة نظر ابوه ان لو الناظر نفسه يعاقب حد يبقى يعاقب محمود لانه هو اللى صحى متاخر و اخره ..الولد مش هو اللى صحى متأخر و طبعا مافيش ناظر عاقل ف الدنيا دى ممكن يحلم ف سره حتى انه يعاقب محمود...

 ......

و احيرا و ليس اخرا قريت ف سرى الفاتحة لمحمود ابويا اللى زى الشهر ده من خمس سنين اغتسل بمية زمزم و اتلف ف  توب ابيض و  سبقنا على عدن ان شاء الله.....

س.م.