Awaad

مسيرى أعود

يا أرض الحب لبراحك

مسيرى أعود

وأقيم من تانى أفراحك

مسيرى أعود

للنيل وللخضرة

مسيرى أعود

يامصر ياحرة

وأنا فى الغربة

حنيت لك

مسكت العود

وغنيت لك

لكنى بكيت

وناديت لك

ورميت العود

رميت العود

وشلت الفاس

ولميت هدمتى وحالي

وقلت لمين أفوت أهلي

و إيه راح يسوى ترحالي

دي أرضي

أرض أجدادي وأولادي

دي بلادي

أفوتها إزاي وأقول زادي

وزوادي

رزاق هناك رزاق هنا

وأنا

لازم أعود

وأشيل العود

وأغني يامصر

علشانك من تانى

مليون موال حب

ومليون غنوة

تكون مليانة أمل

وحنين ووعود

ولازم أعود

مسيرى أعود

يا أرض الحب لبراحك

مسيرى أعود

وأقيم من تانى أفراحك

مسيرى أعود

للنيل وللخضرة

مسيرى أعود

يامصر ياحرة

وأنا فى الغربة

حنيت لك

مسكت العود

وغنيت لك

لكنى بكيت

وصوتى من بكايا انحاش

وقلت فى بالي ياعيالي

رزاق هناك رزاق هنا

وأنا

لازم أعود وأشيل العود

ولميت هدمتي وحالي

وقلت أرجع أشوف حالي

لكن يامصر

مسكت فى ديلي أم العيال

قالت لي لأ يابو العيال

قدر الغلبان يفضل رحال

إحنا لا أصحاب طين

ولا أصحاب مال

إحنا أصحاب فقر ومرض

وأصحاب عيال

إرمى العود الله يهديك

إرميه وعود الله يخليك

وأما يكون لك واسطة ومال

بطل ترحال

وعود ياقريبي ويابو عيالي

وإمسك العود

وغني ياسيدي وجوب الأرض

مش بالطول بس لأ والعرض

وقول موال وميت موال

بس الوقتي سيب العود

وبطل قولة عايز أعود

وخلينا نربي الأولاد

مرعى ولمعى والبت سعاد

بالك يا عواد

نفسي أشوف البت سعاد

فى توب الفرحة

وازغرط وافرح من قلبي ياعواد

وأشيللها بايديه الطرحة

ونتزف معاها فى زفتها

فاكر زفتنا ياعواد

أمك لطمت يومها فى وشي

وقالت لك

من كتر ما لاقيين الزاد

رايحين نطعم فُم جديد

وياعالم بكره دي حتجيب

لنا كام بت وواد

روح منك لله ياعواد

فاكر ياعواد

فى بلدنا ماكناش لاقيين الزاد

الغربة دلوقتى قدرنا ياعواد

هات ياقريبي ويابو عيالي

وياعشرة عمري ياعواد

هات العود

وضحكت فى وشى أم العيال

ست أصيلة أم العيال

مش طماعة يامصر

لأ والله مش طماعة

بس مرارة الفقر معلمه فيها

ضحكت فى وشي وقالت

هات العود

أنا مش حارميه

أنا بس حاشيله لما أوانه يؤون

وربك يفرجها ياعواد

ونطمن بقى عاالأولاد

وعلى الزاد والزواد

ناخد العود على طول

ونعود

معلهش يامصر

أنا سبتلها العود

مش على طول وغلاوتك عندي

وغلاوة مرعى ولمعى والبت سعاد

وغلاوة العود على عواد

مش حاتأخر عنك أبدا

ولازم أعود

مسيرى أعود

يا أرض الحب لبراحك

مسيرى أعود

وأقيم من تانى أفراحك

مسيرى أعود

للنيل وللخضرة

مسيرى أعود

يامصر ياحرة

بس لامؤاخذة يامصر

ضاع العود

والله صحيح مش لاقى العود

أوعى تفكرى مش عايز أعود

أنا فعلا مش لاقى العود

ومش عارف أعود

مش حدوته شاليه فى مراقية

أو حفلات الطبقة الراقية

أنا فعلا مش لاقى العود

بس أنا نازل اشترى واحد

مش واحد بس لأ مليون واحد

ولازم أعود

وتانى مسكت ايديه أم العيال

أصيلة والله ياأم العيال

وقالت لي

القصة ياعواد مش قصة عود

العود جوه فى قلبك أنت

إنت ياعواد اللي نسيت

مكان العود

لو دورت كويس لازم راح تلاقيه

موجود

تاه فى الزحمة ….يمكن

تاه وإحنا بنجرى

ورا لقمة عيشنا

جايز

لكن موجود

أقوللك ما تدورش خلاص على العود

وبطل قولة عايز أعود

لم هدومنا وياللا نعود

لم رحالنا ياعشرة عمري

وياللا نعود

مش قلتلكوا

مش طماعة أم العيال

أصيلة والله ياأم العيال

شفت يامصر

أول ما أترستأت الدنيا

وأطمننا على الأولاد

قالت أعود

وأنا برضه خلاص رايح أعود

وحالاقى العود

وأرجع أغنى لك من تانى

مواويلي المليانة حنين

وأمل ووعود

إتأخرت شوية عليكي يامصر

معلهش سماح

ده أنا برضه العواد … صاحب العود

سمية محمود

The Egyptian Chronicles is a co-op of Egyptian authors.
Articles contained in these pages are the personal views, or work, of the authors,
who bear the sole responsibility of the content of their work.

BACK TO MAIN PAGE

For any additional information, please contact
the Webmaster of the Egyptian Chronicles:

DESIGNED BY